માધુરી દીક્ષિતની હિરોઈન તરીકેની ટીવી સિરિયલ રીજેક્ટ થઈ હતી!

યસ, માધુરી દીક્ષિત હિન્દી ફિલ્મોની હિરોઈન તરીકે સફળ થઈ એ પહેલાં તેણે ટીવી સિરિયલની હિરોઈન બનવા માટે બહુ કોશિશ કરી હતી. એંસીના દાયકાના મધ્ય ભાગમાં માધુરી દીક્ષિતે ઘણા ટીવી સિરિયલ પ્રોડ્યુસર્સની ઓફિસીસનાં પગથિયાં ઘસ્યાં હતાં. હિન્દી ફિલ્મ ઈન્ડસ્ટ્રીમાં મોકો મળી રહ્યો નહોતો એવી સ્થિતિમાં ટીવી સિરિયલની હિરોઈન તરીકે રોલ મળી જાય તો પણ ઘણું એમ વિચારીને માધુરી સતત પ્રયાસ કરતી રહેતી હતી.
એ દરમિયાન માધુરીને એક ટીવી સિરિયલમાં મુખ્ય પાત્ર ભજવવાની તક પણ મળી ગઈ હતી. પરંતુ, માધુરીનું નસીબ બે ડગલાં આગળ હતું એટલે દૂરદર્શને એ સિરિયલ રીજેક્ટ કરી દીધી હતી!

‘નુક્કડ’ સિરિયલે દેશભરમાં ધૂમ મચાવી એ પહેલા લગભગ એવા કન્સેપ્ટવાળી જ એક ટીવી સિરિયલ બનાવવાનો વિચાર પ્રોડ્યુસર-ડિરેક્ટર અનિલ તેજાણી આવ્યો હતો. અનિલ તેજાણીએ લોકલ ટ્રેનની ગિર્દીમાં અને મોંઘવારીમાં પીસાતા અને છતાં હસતા રહેતા મધ્યમવર્ગીય મુંબઈગરાઓ પર ટીવી સિરિયલ બનાવવાનો વિચાર કર્યો. એ ટીવી સિરિયલનું નામ તેમણે ‘બૉમ્બે હૈ મેરી’ રાખ્યું હતું.

                                 ‘બૉમ્બે હૈ મેરી’  સિરિયલનું એક દૃશ્ય

‘નુક્કડ’માં જે રીતે ખોપડી અને બીજા પાત્રો હતા એ જ રીતે ‘બૉમ્બે હૈ મેરી’  સિરિયલનો કન્સેપ્ટ હતો. ફર્ક માત્ર એટલો હતો કે ‘નુક્કડ’માં ચોક દર્શાવાયો હતો, જ્યારે ‘બૉમ્બે હૈ મેરી’માં થોડી આધુનિક સોસાયટી બતાવાઈ હતી. એ સિરિયલમાં મધ્યમવર્ગીય મુંબઈગરાઓની નાની-નાની મુશ્કેલીઓ દર્શાવાઈ હતી અને એવી મુશ્કેલીઓમાંથી ધીરજપૂર્વક અને ક્યારેક અકળાઈને રસ્તો કાપવાની કોશિશ કરતા મુંબઈગરાઓ દર્શાવાયા હતાં.

એ ટીવી સિરિયલ માટે માધુરી દીક્ષિતને હિરોઈન તરીકે સાઈન કરવામાં આવી હતી અને એ સિરિયલમાં માધુરીનો હીરો હતો બેન્જામિન ગિલાની! એ વખતે ટચૂકડા પડદે બેન્જામિન ગિલાનીનું મોટું નામ હતું. તેની સામે ટીવી સિરિયલમાં રોલ મળ્યો એટલે માધુરી ખુશ થઈ ગઈ હતી. પણ ત્યારે માધુરીને ખબર નહોતી કે તેની ખુશી લાંબો સમય ટકવાની નથી. મોટે ઉપાડે એ સિરિયલનું શૂટિંગ શરૂ કરવામાં આવ્યું. એ સિરિયલમાં બેન્જામિન ગિલાની અને માધુરી ઉપરાર કૃષ્ણકાંત જેવા જાણીતા ગુજરાતી કલાકાર પણ હતા.

એ સિરિયલનો એક પાયલટ એપિસોડ પણ તૈયાર થઈ ગયો અને એ પાયલટ એપિસોડ દૂરદર્શનને મોકલી અપાયો. ‘બૉમ્બે હૈ મેરી’ની આખી ટીમ ઉત્સાહમાં હતી, પરંતુ દૂરદર્શનના અધિકારીઓને એ સિરિયલનો પાયલટ એપિસોડ પસંદ ન પડ્યો. તેમણે એ સિરિયલના કન્સેપ્ટમાં અને પાયલટ અપિસોડમાં દમ નથી એમ કહીને ‘બૉમ્બે હૈ મેરી’ના પ્રોડ્યુસરથી માંડીને બેન્જામિન ગિલાની અને માધુરી દીક્ષિતના ઉત્સાહ પર બરફ જેવું ઠંડું પાણી રેડી દીધું.

દુરદર્શને એ સિરિયલ રીજેક્ટ કરી દીધી એથી એ સિરિયલ સાથે સંકળાયેલા સૌ કોઈ ખિન્ન થઈ ગયા. પણ માધુરી તો થોડા દિવસ માટે ડિપ્રેશનમાં સરી ગઈ હતી. મજાની વાત એ હતી કે માધુરી એ દરમિયાન હિન્દી ફિલ્મની હિરોઈન તરીકે રૂપેરી પડદે ચમકી ચૂકી હતી! રાજશ્રી ફિલ્મ્સની ‘અબોધ’ ફિલ્મમાં માધુરીએ હિરોઈનની ભૂમિકા ભજવી હતી.

જોકે એ ફિલ્મ બોક્સઓફિસ પર ખાસ કંઈ ઉકાળી શકી નહોતી, પણ એમ છતાં માધુરીએ રાજશ્રી ફિલ્મ્સ જેવા પ્રતિષ્ઠિત બેનરની ફિલ્મ કરી હતી એ વાત મહત્ત્વની હતી. એટલે જ્યારે દૂરદર્શને ‘બૉમ્બે હૈ મેરી’ સિરિયલ રીજેક્ટ કરી ત્યારે માધુરી હતાશાની લાગણી અનુભવે એ સ્વાભાવિક હતું.

એ વખતે જોકે માધુરીને લાગ્યું હશે કે નસીબ તેનાથી બે ડગલાં આગળ છે, પણ માધુરીની એ સિરિયલને દૂરર્દશને ગ્રીન સિગ્નલ આપી દીધું હોત તો માધુરી કદાચ ક્યારેય ‘ધક ધક ગર્લ’ જેવી સફળતા મેળવી શકી ન હોત. તેનાં પર ટીવી સિરિયલની હિરોઈનનું લેબલ લાગી ગયું હોત તો પછી ફિલ્મ હિરોઈન બનવાનું તેના માટે મુશ્કેલ બની ગયું હોત. માધુરી જ્યારે નંબર વન હિરોઈન બની ગઈ ત્યારે દૂરદર્શનના અધિકારીઓને કદાચ યાદ આવ્યું હશે કે તેમણે માધુરી અભિનિત સિરિયલ ફગાવી દીધી હતી.

જોકે માધુરીએ બોલિવુડમાં તેની કરીઅર જામી ગયા પછી કદાચ મનોમન દૂરદર્શનના એ અધિકારીઓનો આભાર માન્યો હશે કે જેમને તેણે જીવનમાં ક્યારેય જોયા નહોતા. પરંતુ, તેમણે ‘બૉમ્બે હૈ મેરી’ સિરિયલને મંજૂરી ન આપી એટલે માધુરી બૉલિવુડમાં ગઈ અને તેની પ્રતિભાના સહારે નંબર વન હિરોઈન બની ગઈ!

 

આશુ પટેલ
આશુ પટેલ

આશુ પટેલ એટલે સાહસ, ધૈર્ય અને સરળતાનો સમન્વય. ગુજરાતી પત્રકારત્વમાં તેમને નામ અનેક રેકોર્ડ્સ બોલાય છે. આશુ પટેલે જુદાજુદા વિષયો પર 42 પુસ્તકો લખ્યા છે, જેમાં અંડરવર્લ્ડના ઈતિહાસથી માંડીને વાર્તાસંગ્રહ, નવલકથાઓ અને જીવનલક્ષી પુસ્તકોનો સમાવેશ થાય છે. તેમણે અનેક ગુજરાતી અખબારોમાં તંત્રી તરીકે ફરજ બજાવી છે. તેઓ ‘ગુજરાત સમાચાર’, ‘સંદેશ, ‘દિવ્ય ભાસ્કર’ અને ‘મુંબઈ સમાચાર’ સહિત અનેક ટોચના અખબારોમાં કલમ ચલાવી ચૂક્યા છે. હાલમાં તેઓ ‘દિવ્ય ભાસ્કર’માં સાપ્તાહિક કોલમ ‘બ્લેક એન્ડ વ્હાઈટ’ અને ‘મુંબઈ સમાચાર’માં દૈનિક કોલમ ‘સુખનો પાસવર્ડ’ લખે છે. તેઓ અમેરિકા સહિત અનેક દેશોની સરકારના વિશેષ મહેમાન તરીકે વિદેશપ્રવાસો કરી ચૂક્યા છે. તેમની પ્રથમ અંગ્રેજી નવલકથા ‘મેડમ એક્સ’ પ્રકાશિત થઈ છે જેના પરથી પ્રખ્યાત ફિલ્મ ડિરેક્ટર તિગ્માંશુ ધુલિયા હિન્દી ફિલ્મ બનાવી રહ્યા છે.

1 Comment

Leave a Reply

Your email address will not be published.

‘Cocktail Zindagi’ is not just a publication, it is a journey in itself in which you play an important character. We work to bring you stories not only from the crème de la crème but also from the grass root level.We also write content that portrays the beautiful shades of life, thus the name ‘Cocktail Zindagi’.