‘હું અંતહીન પુરુષાર્થમાં માનનારો માણસ છું’ : ઋત્વિજ પટેલ

Cocktailzindagi Exclusive

By – અંકિત દેસાઈ

ડૉક્ટર ઋત્વિજ પટેલે અભ્યાસ એમબીબીએસનો કર્યો છે, પરંતુ ડૉક્ટર તરીકેની પ્રૅક્ટિસ ન કરતાં તેઓ હાલમાં રાજકારણના ક્ષેત્રમાં કાર્યરત છે. ભાજપની એવીબીપીમાંથી વિદ્યાર્થી પરિષદની ચૂંટણીઓથી છાત્ર રાજનીતિની શરૂઆત કરનાર ઋત્વિજ પટેલ હાલમાં ભારતીય જનતા પક્ષના ગુજરાત એકમના યુવા મોરચાના અધ્યક્ષ છે. આવતા વર્ષે દેશની સામાન્ય ચૂંટણી આવી રહી છે ત્યારે યુવાપાંખના અધ્યક્ષ તરીકે તેઓ અત્યારથી ગ્રાઉન્ડ લેવલનું વર્ક કરી રહ્યા છે અને ભાજપને આગામી ચૂંટણીમાં ગુજરાતની લોકસભાની તમામ છવીસ બેઠકો મળે એના પ્રયત્નો કરી રહ્યા છે. આગામી ચૂંટણીની તૈયારીઓ વચ્ચે ડૉક્ટર ઋત્વિજ પટેલ ‘કૉકટેલ ઝિંદગી’ માટે સમય ફાળવે છે. તો પ્રસ્તુત છે એ મુલાકાતના અંશો.

છોડ આએં હમ વો ગલિયાં

અમારો પરિવાર ડૉક્ટર્સનો પરિવાર છે. મારા ફાધર ગાયનેકોલૉજિસ્ટ છે, મારી વાઇફ ડેન્ટિસ્ટ છે અને હું એમબીબીએસ છું. હું નાનો હતો ત્યારથી તબીબ જગતની ઘણો નજીક રહ્યો છું, પરંતુ સાથોસાથ મારા પિતા રાષ્ટ્રીય સ્વયંસેવક સંઘ સાથે નિષ્ઠાપૂર્વક જોડાયેલા છે અને સંઘની ડૉક્ટર્સની જે સંસ્થા છે એમાં વિવિધ સ્તરીય ફરજો નિભાવતા રહ્યા છે. આ કારણે નાનપણથી જ રાષ્ટ્રભાવના અને સશક્ત રાષ્ટ્રનિર્માણની ભાવના મારામાં જાગૃત હતી અને એ માહોલમાં જ મારો ઉછેર થયો.

સ્વાભાવિક છે કે પપ્પા ડૉક્ટર હતા એટલે મારે પણ ઑર્થોપેડિક સર્જ્યન બનવું હતું અને એ સપના સાથે જ હું ભણતરમાં અત્યંત મહેનત પણ કરતો. એ સમયે બારમા ધોરણમાં મારા બાણું ટકા હતા અને મેં અમદાવાદમાં જ મેડિકલ કોલેજમાં ઍડ્મિશન લીધું. પરંતુ આગળ કહ્યું એમ સંઘ પરિવારના સંસ્કારો પણ સમાંતરે મારી અંદર વિસ્તરી રહ્યા હતા એટલે કૉલેજમાં હું ગુજરાત યુનિવર્સિટીના સ્ટુડન્ટ યુનિયનમાં જનરલ સેક્રેટરી બન્યો. પાંચ વર્ષ હું સેક્રેટરી રહ્યો તો ત્યાર પછી મેડિકલ ફૅકલ્ટીનો પહેલો એવો સ્ટુડન્ટ બન્યો જે સેનેટની ચૂંટણી લડ્યો અને જીત્યો. આજેય હજી એ રેકૉર્ડ છે કે મેડિકલ ફૅકલ્ટીનો કોઈ વિદ્યાર્થી આ પ્રકારની કોઈ ચૂંટણી લડ્યો હોય. જોકે ત્યારથી શરૂ થયેલી રાજકીય સફર આજ સુધી ચાલુ જ રહી અને સ્ટુડન્ટ યુનિયનમાંથી ભારતીય જનતા પક્ષના યુવા મોરચામાં આવ્યો. અહીં વિવિધ જવાબદારીઓ નિભાવતો આજે ભારતીય જનતા પક્ષના યુવા મોરચાનો પ્રદેશ અધ્યક્ષ બન્યો.

એવું નથી કે મેં ક્યારેય ડૉક્ટર તરીકે પ્રૅક્ટિસ કરી જ નથી. હું પ્રદેશ કોષાધ્યક્ષ હતો ત્યાં સુધી મેં પ્રૅક્ટિસ કરી જ છે. સ્ટર્લિંગ હોસ્પિટલમાં લિવર ટ્રાન્સપ્લાન્ટ યુનિટમાં મેડિકલ ઑફિસર તરીકે મેં ત્રણ વર્ષ કામ કર્યું હતું, પરંતુ પછી ઉત્તરોઉત્તર પક્ષની જવાબદારીઓ વધતી ગઈ. એ સમય દરમિયાન બનાસકાંઠામાં વિધાનસભાની પેટાચૂંટણી આવી ત્યારે પ્રદીપસિંહ જાડેજાએ મને ચૂંટણીનો યુવામોરચાનો ઇન્ચાર્જ બનાવ્યો, જે મારા માટે ફુલટાઇમ જૉબ હતી. એ સમયે હું નોકરી છોડું તો જ પક્ષની કામગીરીને સમય આપી શકું એમ હતું અને પ્રદીપસિંહજીએ પણ મને પક્ષની કામગીરીમાં સો ટકા આપવાની જ સલાહ આપી એટલે મેં મેડિકલ ઑફિસર તરીકેની નોકરી છોડી દીધી અને પક્ષનાં કામોમાં સંપૂર્ણપણે પરોવાયો.

પગલું ભર્યું કે ના હટવું, ના હટવું  

હા, એ વાત સાચી છે કે હું મારા મેડિકલ પ્રોફેશનને ઘણો મિસ કરું છું. હવે તો એવી સ્થિતિ છે કે મેડિસિનને લગતાં નવાં ડેવલપમેન્ટ્સ કે નવી ટેક્નિક્સ વિશે મને બહુ ઓછી જાણ હોય છે. આ કારણે ક્યારેક ઇમર્જન્સી વખતે અથવા અન્ય કોઈક કિસ્સામાં મારે કોઈને દવા સજેસ્ટ કરવાની હોય તો મારે મારા જુનિયર અથવા કલિગને પૂછવું પડે છે કે આમાં કઈ દવા લેવાય?

જોકે મારો ક્લિનિકલ ઍસ્પેક્ટ ભલે છૂટી ગયો હોય, પરંતુ ઍકૅડેમિક ઍસ્પેક્ટ હજી બરકરાર છે. કર્ણાવતી સ્કૂલ ઑફ ડેન્ટિસ્ટ્રીમાં હું લેક્ચરર છું અને એ રીતે મેડિકલ પ્રોફેશનની નજીક રહેવાનો પ્રયત્ન કરું છું.

સાથે જ હું એ બાબત પણ સ્પષ્ટપણે માનું છું કે જીવનમાં ભલે કોઈ પણ કામ કરતા હોઈએ, પરંતુ એમાં આપણે આપણી સમગ્ર ઊર્જા અને તમામ ક્ષમતાઓને કામે લગાડી દેવી જોઈએ. એટલે મેડિકલ પ્રોફેશનથી ભલે હું દૂર થયો છું, પરંતુ પક્ષનાં કામો અને મારી જવાબદારીઓથી પણ હું એટલો જ ખુશ છું અને એ કામોમાં મારા સો ટકા આપી રહ્યો છું.

વો લમ્હે જો અનછૂએ રહે

હું અત્યંત ખેલદિલી અને નમ્રતાથી સ્વીકારું છું કે હું પરિવાર અને રાજકારણ વચ્ચે બૅલૅન્સ રાખવામાં ફેઇલ ગયો છું. મારો સ્વભાવ એવો છે કે મને મળેલી જવાબદારી અથવા મેં હાથમાં લીધેલા કોઈ કામને હું શ્રેષ્ઠ રીતે પાર ન પાડું ત્યાં સુધી મારા જીવને શાંતિ નથી મળતી. આ કારણે પરિવાર જીવનમાં મેં કેટલીક બાબતો ગુમાવી છે અને એમાંની કેટલીક બાબતો એવી છે જે જીવનમાં ફરી ક્યારેય નથી આવવાની.

દાખલા તરીકે હું જ્યારે યુવા મોરચાનો કોષાધ્યક્ષ હતો ત્યારે ગાંધીનગર મ્યુનિસિપલ કૉર્પોરેશનની ચૂંટણી હતી અને ત્યારે ફીલ્ડમાં મારે ઘણી જવાબદારીઓ નિભાવવાની હતી. બિલકુલ એ જ સમયમાં મારા દીકરાનો જન્મ થયો અને મારી જવાબદારીને કારણે હું મારા દીકરાના જન્મ પછી બહુ થોડા કલાકો તેની સાથે રહી શક્યો હતો. દીકરો જન્મેલો એ રાતથી જ હું ફીલ્ડમાં આવી ગયો હતો!

એ જ રીતે બનાસકાંઠામાં પૂર હતું ત્યારે ભારતીય જનતા પક્ષ દ્વારા પૂરગ્રસ્તવિસ્તારોમાં શિક્ષણકિટ વહેંચવામાં આવી રહી હતી. એ સમયે મારા દીકરાની બાબરી ઉતારવાની હતી અને અમારામાં બાબરીનું ઘણું મહત્ત્વ હોય છે, પરંતુ પક્ષની મારી જવાબદારીઓને કારણે હું એ પ્રસંગમાં ગેરહાજર હતો અને બનાસકાંઠાના વાવમાં શિક્ષણકિટ વહેંચી રહ્યો હતો. મનેય એ બાબતનો અહેસાસ હતો કે ખુશીના કહી શકાય એવા પ્રસંગોએ મારે હાજર રહેવાનું હતું, પરંતુ હું મારા પરિવાર સાથે હાજર ન રહી શક્યો.

ત્રણેક વર્ષથી પરિવાર સાથે ફિલ્મો જોવા જવાનું કે નાટકો માણવા જવાનું સદંતર બંધ થયું છે. બીજી એક મહત્ત્વની અંગત વાત પણ મને યાદ આવે છે કે ગયા વર્ષની વિધાનસભાની ચૂંટણી દરમિયાન અમે ગુજરાતની તમામ વિધાનસભા બેઠકો પર ‘વિજય ટંકાર યુવા સંમેલન’ યોજ્યું હતું. એમાં સોએક જેટલી જગ્યાઓએ તો હું પોતે ગયો હતો અને એ સંમેલનોને કારણે હું અત્યંત વ્યસ્ત હતો. ત્યારે હું મહિનાઓ સુધી ઘરથી બહાર રહેતો અને એ દરમિયાન મારી મમ્મીની મેજર સર્જરી થઈ. જોકે એ દિવસે મારે સર્જરીનું ટૅન્શન ફેસ નહોતું કરવું એટલે હું પક્ષના આઇટી સેલની બેઠકમાં હાજર રહ્યો હતો. એ દિવસ હતો 10 ઑક્ટોબર, 2017નો. ઑપરેશન થયાની રાત્રે હું હૉસ્પિટલ પહોંચ્યો. મેં મમ્મી સાથે ઇશારામાં વાત કરી અને એ રાત ત્યાં જ રોકાઈ ગયો. અગિયારમી ઑક્ટોબરની સવારે મેં જોયું કે મમ્મી ઘણી સારી છે એટલે ડૉક્ટર્સ સાથે વાતચીત કરીને હું ફરી ગુજરાત વિકાસયાત્રા માટે નીકળી ગયો.

પછીના બે દિવસ હું મમ્મી વિશે ફોન પર પૂછતાછ કરતો રહ્યો, પરંતુ તેરમી ઑક્ટોબરે સવારે મને ખબર પડી કે મમ્મીની તબિયત ઘણી બગડી હતી. એટલે હું તેની પાસે જવા રવાના થયો. તેરમી તારીખે બપોરે ત્રણ વાગ્યે હું તેમની પાસે પહોંચ્યો અને સાંજે સાડાનવે મમ્મીનું અવસાન થયું. ત્યારે મને બહુ ફીલ થયેલું કે મમ્મીને જ્યારે મારી જરૂર હતી અથવા તેને એવી ઇચ્છા હતી કે હું તેની સાથે રહું એવા સમયે હું તેની સાથે ન રહી શક્યો. આ એવા લૉસ છે, જે ક્યારેય રિપેર ન કરી શકાય અને એનો પસ્તાવો મને હંમેશાં થાય છે.

રાજકારણની ભાગાદોડીમાં જીવનની ઘણી અંગત અને મહત્ત્વની મોમેન્ટ્સ મેં મિસ જરૂર કરી, પણ અગેઇન હું એવું માનું છું કે દેશને સમર્પિત એક વ્યક્તિ માટે સૌથી પહેલાં દેશ આવે, પછી પક્ષ આવે અને છેલ્લે પોતાની જાત આવે. પણ એક યંગસ્ટર તરીકે હું એમ માનું છું કે રાજકારણ અને પરિવાર વચ્ચે બૅલૅન્સ હોવું જરૂરી છે. હું એ દિશામાં પ્રયત્ન જરૂર કરી રહ્યો છું. તમને જાણીને આશ્ચર્ય થશે અને કદાચ હસવું પણ આવશે, પરંતુ મારો દીકરો હજી હમણાં મને સરખો ઓળખતો થયો છે! જોકે હવે અમારું બૉન્ડિંગ વધી રહ્યું છે અને હું પણ ઘરે હોઉં કે મને થોડો પણ સમય મળે ત્યારે મારા દીકરા સાથે સમય પસાર કરું છું.

પુરુષાર્થ હી તો વીર કા પ્રમાણ હૈ

હું પુરુષાર્થમાં માનું છું અને મારો પુરુષાર્થ અંતહીન છે. આ કારણે હું મારા પરિવારને સમય નથી આપી શકતો કે મારું ગમતું કામ નથી કરી શકતો કે મારી જાત માટેય સુધ્ધાં સમય નથી ફાળવી શકતો. નિરાંત કોને કહેવાય કે રિફ્રેશમેન્ટ કોને કહેવાય એની છેલ્લાં કેટલાંક વર્ષોથી ખબર જ નથી. તોય હું સતત ઊર્જાવાન રહું છું અને મારી ક્ષમતાઓને વિસ્તારતો રહું છું. મને સતત ઊર્જાવાન રહેવાની અને પુરુષાર્થ કરવાની પ્રેરણા નરેન્દ્રભાઈ મોદી, અમિત શાહ, વિજય રૂપાણી કે જિતુ વાઘાણી જેવા લોકો પાસેથી જ મળતી રહે છે.

રચનાત્મક કાર્યો કરતો રહીશ

વડાપ્રધાન નરેન્દ્રભાઈ પાસેથી પ્રેરણા લઈને થોડા મહિનાઓ પહેલાં મેં એક યુથપાર્લમેન્ટનું આયોજન કર્યું હતું અને ભવિષ્યમાં પણ આવા રચનાત્મક કાર્યક્રમો કરવાનો છું, જે કોઈ એક જ પક્ષ કે વિચારધારાથી ઉપર હશે. ગાંધીનગરમાં યોજાયેલી યુથ પાર્લમેન્ટમાં પણ અમે મીનાક્ષી લેખી કે ડૉક્ટર સંબિત પાત્રા સિવાય સૅમ પિત્રોડા કે પ્રિયંકા ચતુર્વેદી જેવા વક્તાઓને બોલાવીએ છીએ અને આજના યુવાનોની સમસ્યા કે જરૂરિયાત કે સોશિયલ મીડિયાના થઈ રહેલા નકારાત્મક ઉપયોગ જેવી બાબતોની ચર્ચા કરીએ છીએ. આ ચર્ચાઓમાંથી જે અર્ક નીકળે એ અમે રાજ્ય સરકાર કે કેન્દ્ર સરકાર સુધી પહોંચાડીએ છીએ અને સમસ્યાઓની દિશામાં સકારાત્મક પગલાં લઈએ છીએ.

કલ કી કલ જાને

રાજકારણમાં આકસ્મિક રીતે આવ્યો એમ કહું તો ચાલે, કારણ કે મારે તો એમબીબીએસ થઈને તબીબ તરીકેની કારકિર્દી બનાવવી હતી. જોકે કૉલેજકાળમાં જ દિશાફેર થઈ અને મને યુવા મોરચાની જવાબદારીઓ મળી. મેં ક્યારેય કોઈ પદની આશા નથી રાખી કે નથી તો કોઈ ચોક્કસ જગ્યાએ પહોંચવાના ગોલ સાથે હું રાજકારણમાં આગળ વધી રહ્યો. જ્યારે હું યુવા મોરચામાં જોડાયો ત્યારે મને ખબર નહોતી કે ન તો મને એવી અપેક્ષા હતી કે હું યુવા મોરચાનો અધ્યક્ષ બનીશ. ભવિષ્યમાં પણ મારો અભિગમ આ જ રહેશે. મારું ધ્યેય માત્ર એટલું જ છે કે મને જે કામ મળે એ મારે નિષ્ઠાપૂર્વક કરવું છે. બીજું, હું મૂલ્યોમાં ઘણું માનું છું એટલે મારી રાજનીતિ પણ મૂલ્યો આધારિત જ હશે. એ સિવાય મારી વ્યક્તિગત મહત્ત્વાકાંક્ષા કોઈ નહીં હોય.

એક ઋત્વિજ યે ભી

અધ્યાત્મ મારું પૅશન છે અને હું અધ્યાત્મમાં રમમાણ રહેવાનું પસંદ કરું છું. આ સિવાય મને ડાન્સ કરવો ગમે અને ઑફબિટ ફિલ્મો લખવી કે ડિરેક્ટ કરવી પણ ગમે. મેં ફિલ્મ પ્રોડક્શનનો કોર્સ કર્યો છે અને ઘણી શોર્ટ ફિલ્મો પણ બનાવી છે. આમ તો મને ગેજેટ્સનો શોખ ઓછો છે, પરંતુ હમણાં-હમણાં મને ઇચ્છા થયા કરે છે કે હું આઇવૉચ અને ઍરપૉડ પહેરું, જેથી વારંવાર ગજવામાંથી ફોન ન કાઢવો પડે અને હું આસાનીથી ફોન પર વાતો કરી શકું.

છૂટા પડતા અગાઉ ઋત્વિજ પટેલને અમે રાજકારણ અને અન્ય મુદ્દે પણ કેટલાક સવાલો પૂછ્યા. પ્રસ્તુત છે એ સવાલ-જવાબ.

તમારા રાષ્ટ્રવાદમાં ગાંધીજીનું સ્થાન શું? હમણાં થોડા સમયથી કેટલાક લોકો ગાંધીજીને ખોટા ચીતરવાના ઘણા પ્રયત્નો કરી રહ્યાં છે.

ગાંધીજી આપણા રાષ્ટ્રપિતા છે અને તેમણે દેશ માટે અને સામાજિક સમરસતા માટે અનન્ય યોગદાન આપ્યું છે અને હું એને સમર્થન આપું છું. વળી ગાંધીજીને ખોટા ચિતરનારાઓનું અમે ક્યારેય સમર્થન કરીએ જ નહીં. અરે, ગાંધીજીની દોઢસોમી જયંતી જ અમે ઊજવી રહ્યા છીએ.બાકી ગાંધીજીનો લાભ કોણે કઈ રીતે લીધો એ જાણવું હોય તો આપણે એક અલાયદો ઇન્ટરવ્યુ રાખવો પડે. ગાંધીજી કે સરદાર પટેલ જેવા નેતાઓ અમારા આદર્શ છે અને અમે તેમનાં મૂલ્યો પર જ ચાલીએ છીએ. ગાંધીજીની વિચારધારા કે તેમની વાતો અમારાથી પર નથી અને અમે બિલકુલ તેમને સમર્થન આપીએ છીએ.

આજકાલ નવી કૉઇન થયેલી અર્બન નક્સલિઝમ ટર્મ શું છે? નક્સલવાદ તો ભૂખનો, અસંતોષનો પ્રશ્ન હતો.

અરે ના-ના, નક્સલવાદ ભૂખનો નહીં, કૉન્ગ્રેસની સરકારની નિષ્ફળતાઓનો પ્રશ્ન છે. તેમણે દેશના શોષિતો, પીડિતો, વંચિતો કે દેશના છેવાડાના માણસ માટે કંઈ ન કર્યું ત્યારે જ તો આ પ્રશ્ન ઊભો થયો. એમાં આપણી કમનસીબી એ છે કે દેશવિરોધી તત્ત્વો એ સમસ્યાનો જુદી રીતે દુરુપયોગ કરી રહ્યાં છે. બાકી રાષ્ટ્રીય સ્વયંસેવક સંઘ તો પંચનિષ્ઠામાં અને લક્ષ અંત્યોદય, પથ અંત્યોદયમાં માને છે.

જોકે મુદ્દો એ છે કે સસ્તી પ્રસિદ્ધિ માટે કે રાજકીય લાલસા માટે જે આ અર્બન નક્સલાઇટ્સ પેદા થઈ રહ્યા છે એમનો અમે સામનો કરીશું અને તેઓ જે ભાષામાં સમજે એ ભાષામાં તેમને જવાબ આપીશું. ઋત્વિજ પટેલને કોરાણે મૂકી દો કે ભારતીય જનતા પક્ષના નેતાને ભૂલી જાઓ, પરંતુ આપણા દેશની ધરતી પર ‘અફઝલ હમ શર્મિંદા હૈં તેરે કાતિલ ઝિંદા હૈં’ જેવા નારા બોલાય ત્યારે દેશના એક નાગરિક તરીકે તમારું લોહી કેમ ન ઊકળી ઊઠે? અરે ભાઈ, જે માણસે દેશની લોકશાહીનું મંદિર એવી સંસદ પર હુમલો કરાવ્યો એ માણસને ફાંસી અપાય એમાં તમે શર્મિંદા શેના થાઓ છો? ‘ભારત તેરે ટુકડે હોંગે ઇન્શાઅલ્લાહ ઇન્શાઅલ્લાહ’ અરે ભાઈ, શું છે આ? આ અર્બન નક્સલિઝમ જ છે અને એને કોઈકાળે સહન ન કરી શકાય.

વર્ગવાદ અને જ્ઞાતિવાદનું રાજકારણ ક્યારે દૂર થશે? આખરે મંત્રીમંડળોમાં પણ જ્ઞાતિ અને વર્ગને ધ્યાનમાં રાખીને પ્રાધાન્ય અપાય છે. ત્યારેય લાયકાતને પછી ધ્યાનમાં લેવાય છે

હું માનું છું ત્યાં સુધી સમાજના દરેક વર્ગને સ્થાન મળે અને દરેક વિસ્તારના પ્રતિનિધિને તક મળે એ હિસાબે મંત્રીમંડળો નક્કી થતાં હોય છે. જ્યાં સુધી વર્ગવાદ કે જ્ઞાતિવાદની રાજનીતિની વાત છે તો અમે એવી રાજનીતિ નથી કરતા.

તમે પોતે પણ પાટીદાર છો. પાટીદાર અનામત આંદોલનને તમે કઈ રીતે જુઓ છો અને શું પાટીદારોને અનામત મળવી જોઈએ?

ભારતીય જનતા પાર્ટી સમાજિક સમરસતામાં માને છે. પાટીદાર આંદોલન કે અન્ય કોઈ પણ આંદોલન એ વર્ગવિગ્રહ કરાવવાના હેતુથી જ કરાયું છે જેનો આશય કોઈ પ્રજા કે સમાજના લાભ માટેનો નહીં, પરંતુ પોતાની વોટબૅન્ક ઊભી કરવા માટેનો છે. આવું ગંદું રાજકારણ કરવા પાછળનું માસ્ટર માઇન્ડ કૉન્ગ્રેસ છે, પરંતુ સમય સમયનું કામ કરતો જ હોય છે અને એટલે જ પાટીદાર સમાજ કે અન્ય કોઈ પણ સમાજના લોકો તેમના ખરાબ ઇરાદાઓ વિશે જાણી ચૂક્યા છે, જેનું રિફ્લેક્શન એક વર્ષ પહેલાં યોજાયેલી ગુજરાત વિધાનસભાની ચૂંટણીમાં જોવા મળ્યું હતું.

હું કહીશ કે પાટીદાર સમાજના સંસ્કાર અને સહકારથી જ મારી પ્રગતિ થઈ છે; પરંતુ મને જે નેતૃત્વ મળ્યું છે એ માત્ર પાટીદાર સમાજનું જ નેતૃત્વ નથી, તમામ સમાજ કે વર્ગોના યુવાનોનું મારે નેતૃત્વ કરવાનું છે અને બધાને ન્યાય મળે અને બધાની પ્રગતિ થાય એ દિશામાં હું હંમેશાં કાર્યરત્ રહ્યો છું.

હવે પાટીદારોને અનામત મળવી જોઈએ કે નહીં એની વાત કરીએ તો હું કહીશ કે આર્થિક તર્જ પર અનામત મળવી જ જોઈએ અને ભારતીય જનતા પક્ષની સરકાર ગુજરાતની પહેલી સરકાર છે જે 10 ટકા ઈબીસી લાવી છે.

2019ની તૈયારી કેવી ચાલે છે?

તડામાર અને જોરદાર. આવતી ચૂંટણીમાં પણ શિર્ષસ્થ નેતાઓની મહેનત અને તેમના માર્ગદર્શન હેઠળ છવીસે છવીસ બેઠકો ભાજપ જીતી લેવાનું છે.

ખરેખર એવું થશે ખરું? ગઈ વિધાનસભામાં જે પ્રકારના આંકડા જોવા મળ્યા એ હિસાબે લોકસભામાં બધી બેઠકો આવશે ખરી?

શું કામ નહીં આવે? આવશે જ. હું તો કહીશ કે માત્ર અગલી બાર નહીં, હર બાર મોદી સરકાર બાર બાર, મોદી સરકાર.

ફોટોગ્રાફ્સ: એલિવિએટ સ્ટુડિયો

 

કૉકટેલ ઝિંદગી
કૉકટેલ ઝિંદગી

કૉકટેલ ઝિંદગી - ગુજરાતી પત્રકારત્વમાં ઈન્ટરનેશનલ સ્ટાન્ડર્ડ્સ ધરાવતું સૌપ્રથમ લાઈફ સ્ટાઈલ મેગેઝીન.

No Comments Yet

Leave a Reply

Your email address will not be published.

‘Cocktail Zindagi’ is not just a publication, it is a journey in itself in which you play an important character. We work to bring you stories not only from the crème de la crème but also from the grass root level.We also write content that portrays the beautiful shades of life, thus the name ‘Cocktail Zindagi’.

Latest issue is available
Cocktail Zindagi