સાત + એક = શૂન્ય

આશુ પટેલ

પ્રકરણ ચાર

નિશા નારંગ અને કરણને એકબીજાના આલિંગનમાં જોઇને નિશાનો ક્લોઝ ફ્રેન્ડ રોહન સલૂજા પોતાના હૃદયની લાગણીને માંડ માંડ કાબૂમાં રાખી રહ્યો હતો ત્યારે ટેરેસના એક ખૂણે ઊભા ઊભા એક યુવાન પણ મનોમન નિશા પ્રત્યે કડવાશની લાગણી ઘૂંટી રહ્યો હતો. તે નિખિલ મલ્હોત્રા હતો, નિશાની પહેલી ફિલ્મ ‘મૈં તેરી દીવાની’નો હીરો.

નિખિલ મલ્હોત્રાએ નિશાને પહેલી વાર ‘મૈં તેરી દીવાની’ ફિલ્મના મહૂર્ત વખતે જોઇ ત્યારે તે અત્યંત માસૂમ લાગતી હતી. એ વખતે નિખિલ મલ્હોત્રાની ત્રણ ફિલ્મો રીલિઝ થઇ ચૂકી હતી. એમાંથી બે ફિલ્મોએ જો કે બોક્સ ઓફિસ પર ખાસ કશું ઉકાળ્યું નહોતું. પણ એ બંને ફિલ્મે એવરેજ બિઝનેસ કર્યો હતો એના કારણે નિખિલ મલ્હોત્રાનું નામ અને ચહેરો જાણીતાં બની ગયાં હતાં. એ રીતે નિખિલ મલ્હોત્રાએ નિશા સામે હીરો તરીકે ફિલ્મ સાઇન કરીને નિશા પર ઉપકાર કર્યો હતો. એ સિવાય પણ ‘મૈં તેરી દીવાની’નાં શૂટિંગ દરમિયાન તે નિશાને પ્રોત્સાહન આપતો રહ્યો હતો. શૂટિંગના પહેલા દિવસે નિશા ફિલ્મીસ્તાન સ્ટુડિયોના સેટ પર આવી ત્યારે તે નર્વસ હતી. નિખિલ મલ્હોત્રાએ તેની સાથે હસીમજાક કરીને તેને આત્મવિશ્વાસપૂર્વક કેમેરા સામે જવા તૈયાર કરી હતી. એ પછી પણ નિખિલ આખી ફિલ્મના શૂટિંગ દરમિયાન નિશાને પ્રોત્સાહન આપતો રહ્યો હતો.

જો કે નિખિલ મલ્હોત્રા અને નિશાના કમનસીબે ‘મૈં તેરી દિવાની’ ફિલ્મ બોક્સ ઓફિસ પર ખરાબ રીતે પીટાઇ ગઇ હતી. પણ એ પછી નિશાની બીજી જ ફિલ્મ ‘તેરે ઇશ્ક મેં સનમ’ સુપર હિટ થઇ ગઇ અને નિશાના નસીબ આડેથી પાંદડું ખસી ગયું. પરંતુ, નિખિલ મલ્હોત્રાનું નસીબ બે ડગલાં આગળ હતું એટલે આજે પણ તે એક હિટ ફિલ્મની રાહ જોઇ રહ્યો હતો. નિશાની બે ફિલ્મો ગોલ્ડન જ્યુબિલી અને છ ફિલ્મો સિલ્વર જ્યુબિલી સુધી પહોંચી ગઇ હતી એના કારણે નિશા એ ગ્રેડની હીરોઇન બની ગઇ હતી. પરંતુ, બાપડો નિખિલ મલ્હોત્રા બી ગ્રેડનો હીરો જ બની રહ્યો હતો.

નિશા તેની પહેલી ફિલ્મના હીરો નિખિલ મલ્હોત્રાથી ઘણી આગળ નીકળી ગઇ હતી. પણ એમ છતાં તેણે નિખિલ સાથે એક ફ્રેન્ડ તરીકે સંબંધ રાખ્યો હતો. પરંતુ, નિખિલ મલ્હોત્રા સાથે હીરોઇન તરીકે ફિલ્મ સાઇન કરવા તે તૈયાર થતી નહોતી. નિખિલ મલ્હોત્રાએ નિશાને પોતાની સાથે ફિલ્મ સાઇન કરવા માટે વિનવી હતી, પણ નિશાએ સલુકાઇથી વાત ટાળી દીધી હતી. તેને નિખિલ મલ્હોત્રા સાથે દોસ્તી રાખવામાં વાંધો નહોતો પણ સફળતાએ તેને એટલી સ્માર્ટ બનાવી દીધી હતી કે હવે તે લાગણી અને કેરિયરને મિક્સ થવા દેતી નહોતી.
નિખિલ મલ્હોત્રા સફળ હીરો બને એવું તે એક દોસ્ત તરીકે ઇચ્છતી હતી, પણ નિખિલને સફળ હીરો બનાવવા માટે પોતાની કરિયરમાં અવરોધ ઊભો કરવાની તેની તૈયારી નહોતી. એમાંય દિગ્દર્શક કરણ ખન્ના સાથે પ્રેમમાં પડ્યા પછી એ વધુ ગણતરીબાજ થઇ ગઇ હતી.
આ બધું વિચારી રહેલા નિખિલ મલ્હોત્રાના મનમાં નિશા પ્રત્યે આક્રોશની લાગણી જન્મી હતી અને એ લાગણી ઘૂંટાઇ ઘૂંટાઇને નફરતમાં પલટાઇ રહી હતી. નિશાની સાથે તેના પ્રેમી કરણ પ્રત્યે પણ તેના મનમાં છાનો રોષ હતો. નિખિલ મલ્હોત્રાએ નિશા અને કરણની સામે ખુન્નસભરી નજર ફેરવી.

* * *

નિશાની બર્થ ડે પાર્ટીમાં આવેલા ફિલ્મ પ્રોડ્યુસર અજિત પાલીવાલ પણ કંઇક અંશે નિખિલ મલ્હોત્રા જેવી લાગણી અનુભવી રહ્યા હતા. અજિત પાલીવાલની ત્રણ ફિલ્મમાં નિશા હીરોઇન તરીકે આવી ચૂકી હતી. નિશાના પેન્ટહાઉસની ટેરેસ પાર્ટીમાં અજિત પાલીવાલ સુપર સ્ટાર વિજયકુમાર અને નંબર વન હીરોઇન ચાંદની અને નિશાની ફ્રેન્ડ મોહિની સાથે અલકમલકની વાતો કરી રહ્યા હતા. ચાંદની પણ અજિત પાલીવાલની અનેક ફિલ્મોમાં અભિનય કરી ચૂકી હતી.

થોડી વાર પછી કરણ અને નિશા પણ અજિત પાલીવાલ, વિજયકુમાર અને ચાંદની તથા મોહિની સાથે ગપ્પાં ગોષ્ટિમાં જોડાયાં. નિશા અજિત પાલીવાલને ‘સર, સર’ કહીને સંબોધી રહી હતી ત્યારે અજિત પાલીવાલના માનસપટ પર બે દિવસ અગાઉ દૃશ્ય તાજું થઇ રહ્યું હતું.
* * *

‘નિશાજી, હમારે પાસ એક સોલિડ સ્ક્રિપ્ટ આઇ હૈ, અગર આપ કી ડેટ્સ મિલે તો હમ કૃણાલ કે સાથ આપકી નઇ ફિલ્મ લોન્ચ કરતે હૈ’, પ્રોડ્યુસર અજિત પાલીવાલે ટિપિકલ બોલીવૂડની ભાષામાં નિશા સામે દરખાસ્ત મૂકી. કૃણાલ તેમનો દીકરો હતો અને તેને સફળ હીરો બનાવવા માટે અજિત પાલીવાલ મથામણ કરી રહ્યા હતા. તેમણે અગાઇ કૃણાલને હીરો તરીકે લઇને બે ફિલ્મ બનાવી હતી પણ એ બન્ને ફિલ્મોનો બોક્સ ઓફિસ પર ધબડકો થઇ ગયો હતો.

‘થેન્ક યુ વેરી મચ ફોર યોર ઓફર સર, પર આપ તો જાનતે હૈ મેરે પાસ અગલે તીન સાલ તક કોઇ ભી ડેટ્સ અવેલેબલ નહીં હૈ.’ નિશાએ પોતાના અવાજમાં શક્ય એટલી મીઠાશ ભેળવીને કહ્યું.

નિશા અને અજિત પાલીવાલ બન્ને બરાબર સમજતા હતા કે કૃણાલની સામે નિશા હીરોઇન તરીકે હોય તો એ ફિલ્મ બોક્સ ઓફિસ પર ચાલી જાય. પાલીવાલ પોતાના દીકરા કૃણાલને પ્રમોટ કરવા જ એ ફિલ્મ બનાવવા માગતા હતા. પણ તેમનો દીકરો કોઇ રીતે હીરો તરીકે ચાલે એમ નહોતો. હિન્દી ફિલ્મ ઇન્ડસ્ટ્રીમાં પાછળથી બધા તેની હાંસી ઉડાવતા હતા. અજિત પાલીવાલને પણ એ વાતની ખબર હતી. એમ છતાં પાલીવાલે પોતાના દીકરાને હીરો તરીકે સફળ બનાવવાનો નિશ્ચય કરી લીધો હતો.

નિશાએ ડેટનું બહાનું કાઢીને સારી ભાષામાં નનૈયો જ સંભળાવ્યો હતો. એમ છતાં અજિત પાલીવાલે તેને વિનંતી કરી કે, ‘આપ એક બાર સ્ક્રીપ્ટ તો પઢ લિજિયે નિશાજી, યે ફિલ્મ મેં હીરોઇન કા રોલ સબસે ઇમ્પોર્ટન્ટ હૈ.’

નિશાએ તેમને ટૂંકો અને શુષ્ક જવાબ આપ્યો, ‘ઓ.કે. ઠીક હૈ, મૈં સ્ક્રીપ્ટ પઢકે બતાતી હૂં.’ પછી તેણે વાતનો વિષય બદલીને ભાભીજીના ખબર અંતર પૂછીને આત્મીયતા બતાવી. નિશાના અવાજના ટોન પરથી પાલીવાલ સમજી ગયા કે નિશાને કૃણાલ સામે ફિલ્મ સાઇન કરવામાં રસ નથી.

નિશા સાથે વાત કર્યા પછી અજિત પાલીવાલ હતાશ થઇ ગયા. તેમને ખબર હતી કે નિશા પાસે બે ડઝન ફિલ્મ છે અને એમાંની છ ફિલ્મનું શૂટિંગ તબક્કાવાર ચાલી રહ્યું છે. પણ આટલું વ્યસ્ત શેડ્યુલ હોવા છતાં નિશાને કોઇ મોટા ગજાનો ફિલ્મ પ્રોડ્યુસર દમદાર સ્ક્રીપ્ટ સાથે ફિલ્મની ઓફર કરે તો નિશા એ ઓફર સ્વીકારતી હતી.

અજિત પાલીવાલને વધુ ગુસ્સો એ વાતનો આવ્યો હતો કે તેમની ફિલ્મથી જ નિશા સ્ટાર બની હતી. નિશાની પહેલી હીટ ફિલ્મ ‘તેરે ઇશ્ક મેં સનમ’ તેમણે પ્રોડ્યુસ કરી હતી. પણ નિશા એ વાત જાણે ભૂલી ગઇ હતી. નિશા તેમની ઓફર ઠુકરાવીને રવાના થઇ એ પછી અજિત પાલીવાલ મનોમન બબડ્યા હતા, ‘મેરી બિલ્લી ઔર મુઝસે હી…?’ તેમણે નિશાના પ્રેમી કરણને પણ મનોમન ભાંડ્યો હતો.

એ પછી નિશાએ ફોન કરીને અજિત પાલીવાલને પોતાની બર્થ ડે પાર્ટીમાં બોલાવ્યા હતા. ઇચ્છા ન હોવા છતાં પાલીવાલ નિશાની પાર્ટીમાં આવ્યા હતા. ફિલ્મ ઇન્ડસ્ટ્રીમાં ઘણી વાર તમાચો મારીને ગાલ રાતો રાખવો પડતો હોય છે. જો કે તેમના કિસ્સામાં તો તેમની ફિલ્મની ઓફર ઠુકરાવીને નિશાએ તેમને જાણે સણસણતો તમાચો ઝીંકી દીધો હતો.

* * *

‘ક્યા સોચ મેં પડ ગયે સર!’ નિશાએ સહેજ ઊંચા અવાજે કહ્યું અને પાલીવાલ થોડા ઝંખવાઇ ગયા. તેમને ખ્યાલ રહ્યો નહોતો કે તેઓ બધાની વચ્ચે થોડી વાર માટે બેધ્યાન બની ગયા હતા.

‘નહીં નહીં, કુછ નહીં, મુજે એક અર્જન્ટ કામ યાદ આ ગયા થા’, જાણે પોતાનો બચાવ કરતા હોય એમ તેઓ બોલ્યા.

પાલીવાલે વ્યક્ત રીતે તો એ શબ્દો બોલ્યા હતા પણ તેમના અવ્યક્ત શબ્દો તેમના હોઠ સુધી આવી ગયા હોત તો નિશા સહિત બધાએ પગ પાસે બોમ્બ ફૂટ્યો હોય એવી લાગણી અનુભવી હોત. અજિત પાલીવાલ પોતાના હોઠ સુધી આવી ગયેલા શબ્દો ગળી ગયા હતા. બાકી તેમને કહેવું હતું કે, ‘સાલી કૂતરી, તારી અને કરણની સુપારી આપીને તમને બંનેને ખતમ કરાવી દેવાનું હું વિચારી રહ્યો હતો!’

(ક્રમશઃ)

આશુ પટેલ
આશુ પટેલ

આશુ પટેલ એટલે સાહસ, ધૈર્ય અને સરળતાનો સમન્વય. ગુજરાતી પત્રકારત્વમાં તેમને નામ અનેક રેકોર્ડ્સ બોલાય છે. આશુ પટેલે જુદાજુદા વિષયો પર 42 પુસ્તકો લખ્યા છે, જેમાં અંડરવર્લ્ડના ઈતિહાસથી માંડીને વાર્તાસંગ્રહ, નવલકથાઓ અને જીવનલક્ષી પુસ્તકોનો સમાવેશ થાય છે. તેમણે અનેક ગુજરાતી અખબારોમાં તંત્રી તરીકે ફરજ બજાવી છે. તેઓ ‘ગુજરાત સમાચાર’, ‘સંદેશ, ‘દિવ્ય ભાસ્કર’ અને ‘મુંબઈ સમાચાર’ સહિત અનેક ટોચના અખબારોમાં કલમ ચલાવી ચૂક્યા છે. હાલમાં તેઓ ‘દિવ્ય ભાસ્કર’માં સાપ્તાહિક કોલમ ‘બ્લેક એન્ડ વ્હાઈટ’ અને ‘મુંબઈ સમાચાર’માં દૈનિક કોલમ ‘સુખનો પાસવર્ડ’ લખે છે. તેઓ અમેરિકા સહિત અનેક દેશોની સરકારના વિશેષ મહેમાન તરીકે વિદેશપ્રવાસો કરી ચૂક્યા છે. તેમની પ્રથમ અંગ્રેજી નવલકથા ‘મેડમ એક્સ’ પ્રકાશિત થઈ છે જેના પરથી પ્રખ્યાત ફિલ્મ ડિરેક્ટર તિગ્માંશુ ધુલિયા હિન્દી ફિલ્મ બનાવી રહ્યા છે.

1 Comment

Leave a Reply

Your email address will not be published.

‘Cocktail Zindagi’ is not just a publication, it is a journey in itself in which you play an important character. We work to bring you stories not only from the crème de la crème but also from the grass root level.We also write content that portrays the beautiful shades of life, thus the name ‘Cocktail Zindagi’.