તો રિચા ટીવી જર્નાલિસ્ટ બની હોત

ગેંગ્સ ઓફ વાસેપુર ફિલ્મથી હિન્દી ફિલ્મ ઇન્ડસ્ટ્રીમાં પોતાનું સ્થાન જમાવનારી હીરોઇન રિચા ચઢ્ઢાએ ફિલ્મ અગાઉ નિષ્ફળતાનો સામનો કરવો પડ્યો હતો. જોકે બીજી ઘણી હીરોઇનો કરતાં તેણે પ્રમાણમાં ઓછો સંઘર્ષ કર્યો છે. ઘણી યુવતીઓ ડૉક્ટર કે આર્કીટેક્ટ બનવા માગતી હોય અને અચાનક સંજોગો તેમને ફિલ્મોમાં ખેંચી લાવે અને એ યુવતીઓ સફળ હીરોઇનો બની હોય એવા અનેક કિસ્સાઓ હિન્દી ફિલ્મ ઇન્ડસ્ટ્રીમાં બને છે, પણ રિચાના કિસ્સામાં એવું નથી. એ ચાર વર્ષની થઈ ત્યારથી જ રૂપેરી પડદે ચમકવાનું જોવા લાગી હતી.

રિચા સમજણી થઈ ત્યારથી હીરોઇનોના અભિનયની નકલ કરતી હતી. તેને ભણવામાં બહુ રસ નહોતો. તે ઓછા માર્કસ આવે એ માટે મહેનત કરતી હતી. ‘રખે ને વધુ માર્કસ આવે અને માતા-પિતા ભણવા પર જ ધ્યાન દેવાનું કહે તો! એવા વિચારોથી રિચા શક્ય એટલા ઓછા માર્કસ લાવવાની કોશિશ કરતી! દરેક વખતે પરિણામ આવે ત્યારે રિચાને ટેન્શન થતું કે આ વખતે વધુ માર્કસ આવી જશે! તેની સાથે ભણતા બીજા વિદ્યાર્થીઓ અભ્યાસ પાછળ જેટલો સમય ગાળતા હતા એના ચોથા ભાગ જેટલો સમય પણ રિચા અભ્યાસ પાછળ નહોતી ગાળતી.

રિચાના માતા-પિતા દિલ્હીમાં પ્રોફેસર્સ હતા અને તેઓ દીકરીને બહુ ભણવવા માગતા હતા, પણ રિચાને ભણવા કરતાં અભિનયમાં વધુ રસ હતો. રિચા પ્રાઈમરી સ્કૂલમાં હતી ત્યારથી અરીસા સામે ખાસ્સો સમય ગાળતી. પોતાના કઝિન અને ફ્રેન્ડ્સ સામે તે પોતાની અભિનયકળાનું પ્રદર્શન કરતી. તેના માતા-પિતા તેને ભણવામાં ધ્યાન આપવા માટે ખખડાવતા ત્યારે તે તેમને હીરો-હીરોઇનની નકલ કરીને હસાવી દેતી હતી. જોકે રિચા મોટી થઈ એ પછી તેના માતા-પિતાએ તેને સમજાવી કે અભિનયના ઉધામા છોડી દે અને કંઈક સરખી કરીઅર બનાવવા પર ધ્યાન આપ. તેના માતા-પિતા તેને ટીવી જર્નાલિસ્ટ બનાવવા માગતા હતા. માતા-પિતાના આગ્રહથી રિચાએ સોફિયા કૉલેજમાં પત્રકારત્વનો કોર્સ કરવો પડ્યો. કોર્સ કર્યા પછી રિચાને કેટલાક મહિનાઓ પછી પુરુષો માટેના એક મેગેઝિનમાં નોકરી મળી પણ ગઈ. એ મેગેઝિનમાં નોકરી કરતી વખતે રિચાએ સેલિબ્રિટિના ઇન્ટરવ્યૂ મેળવવા માટે તેમને આજીજી કરવી પડતી હતી.

આ રીતે સેલિબ્રિટિઝની મુલાકાત મેળવવાના પ્રાયાસ દરમિયાન તેણે અભય દેઓલ પાછળ પણ ફરવું પડ્યું હતું. એ વખતે અભય દેઓલ પોતે પણ બહુ નામ કમાયો નહોતો, પણ તેણ બહુ નખરાં કર્યા હતા અને રિચાને મુલાકાત આપી નહોતી. અભય દેઓલે રિચાને મુલાકાત આપાવામાં બહુ રસ ના બતાવ્યો ત્યારે કલ્પના પણ નહીં હોય કે એક વર્ષ પછી આ છોકરી તેની ફિલ્મમાં હીરોઇન બનશે! રિચાએ દિલ્હીમાં જાણીતા નાટ્યકાર અને અભિનયની પાઠશાળા સમા ગણાતા બેરી જોહન સાથે કામ કર્યું હતું. શાહરુખ ખાન અને સુશાંતસિંહ રાજપૂત જેવા અનેક સફળ ફિલ્મસ્ટાર્સના ગુરુ બેરી જોહને રિચામાં અભિનયપ્રતિભા જોઈ હતી અને તેને પ્રોત્સાહિત કરી હતી.

રિચાએ પુરુષો માટેના મેગેઝિનમાં પત્રકાર તરીકે નોકરી કરવાનું ના ફાવ્યું અને થોડા મહિનાઓમાં તેણે એ નોકરી છોડી દીધી. તેણે પોતાના માતા-પિતાને સમજાવ્યા કે અભિનય સિવાય મને બીજા કશામાં રસ પડતો નથી અને એના સિવાય બીજું કંઈ પણ કરવા જઈશ તો મને સફળતા નહીં મળે. માતા-પિતાને સમજાવીને રિચા મુંબઈ આવી ગઈ અને તેણે પોતાનું તમામ ધ્યાન અભિનય પર કેન્દ્રિત કર્યું. એ અરસામાં જ અભિનયગુરુ બેરી જોહન પણ દિલ્હીથી મુંબઈ આવી ગયા હતા અને તેમણે ‘બગદાદ કા ગુલામ’ નાટકના રિહર્સલ્સ શરૂ કર્યા હતા. આ એ જ નાટક હતું જેમાં અગાઉ શાહરરુખ ખાન બેરી જોહનની પાસેથી અભિનય તાલીમ લેતી વખતે અભિનય કરી ચૂક્યો હતો.

રિચાને બેરી જોહનના એ નાટકમાં રોલ મળ્યા પછી તેને હિન્દી ફિલ્મની ઓફર મળી. ‘બગદાદ કા ગુલામ’ નાટકમાં રિચાનો અભિનય જોઈને જ તેને તેની પહેલી ફિલ્મ ‘ઓયે લકી! લકી ઓયે!’ની ઓફર મળી. એ ફિલ્મમાં રિચાની સાથે અભય દેઓલને સાઈન કરાયો હતો. એ ફિલ્મ મળ્યા પછી રિચા જાણે સાતમા આસમાનમાં વિહરવા લાગી હતી, પણ એ ફિલ્મ રિલિઝ થઈ એ વખતે રિચા હતાશ થઈ ગઈ હતી. પોતાની પહેલી ફિલ્મને થિયેટરમાં શું રિસ્પોન્સ મળે છે એ જોવા માટે રિચા પહેલા જ દિવસે મુંબઈના એક થિયેટરમાં ગઈ હતી. તેને એમ હતું કે ઓડિયન્સ એ ફિલ્મ જોઈને તાળીઓ પાડતું હશે, પણ એને બદલે તેને ખાલીખમ સીટ્સ જોવા મળી. માત્ર ત્રણ પ્રેક્ષકો એ થિયેટરમાં બેઠા હતા એ જોઈને રિચા હતપ્રભ થઈ ગઈ. ‘ઓયે લકી! લકી ઓયે!’ ફિલ્મ મુંબઈ પર પાકિસ્તાની આતંકવાદીઓના 26/11ના હુમલાથી જેટલા હેબતાઈ ગયા હતા એટલી જ રિચા પોતાની ફિલ્મના ધબડકાથી હેબતાઈ ગઈ હતી. જોકે એ ફિલ્મને વિવેચકોએ વખાણી અને રહી રહીને એ ફિલ્મને થોડો સારો પ્રતિસાદ મળ્યો હતો.

રિચાની પહેલી ફિલ્મને સફળતા ના મળી, પણ રિચાના અભિનયની કેટલાક ફિલ્મસર્જકોએ નોંધ લીધી હતી એટલે તેને નવી ફિલ્મ્સ માટે ઓડિશનના ચાન્સ મળવા લાગ્યા. પરંતુ વાત ઓડિશનથી આગળ વધતી નહોતી. તેણે અનેક ફિલ્મ્સ માટે ઓડિશન આપ્યા પછી નિરાશ થવું પડ્યું. ‘દેવ ડી’ ફિલ્મ પણ એવી જ એક ફિલ્મ હતી, જેના માટે રિચાએ ઓડિશન આપ્યા પછી તેને પસંદ કરાઈ નહીં. એ ફિલ્મ માટે રિચાને બદલે કલ્કી કોચલિનને પસંદ કરી લેવાઈ. એ વખતે જોકે અનુરાગ કશ્યપે રિચાને કહ્યું હતું કે, મારી એક ફિલ્મમાં હું તને મહત્ત્વનો રોલ આપીશ. જોકે એવા ઘણા વચન ઘણા ફિલ્મસર્જકો તરફથી મળ્યા હતા, પણ વાત વચન પૂરતી જ રહી જતી હતી એટલે રિચા નિરાશામાં સરી પડી. 2010ના ઓગસ્ટ મહિનામા રિચા બહુ હતાશ થઈ ગઈ હતી ત્યારે રિચાની ફ્રેન્ડ્સ તેને ફરવા માટે લોનાવાલા લઈ ગઈ. એ હિલસ્ટેશન પર વરસાદી માહોલમાં પણ રિચા ઉદાસ હતી ત્યારે અચાનક અનુરાગ કશ્યપે કોલ કર્યો અને સીધું જ પૂછ્યું, હું ‘ગેંગ્સ ઓફ વાસેપુર’ ફિલ્મ બનાવી રહ્યો છું. તારે એમાં લીડ રોલ કરવો છે?’

અનુરાગ કશ્યપના એ શબ્દો સાંભળીને રિચા ખુશીથી રડી પડી. એ સમયમાં તેને કંઈ કામ મળતું નહોતું એટલે તેણે પોતાના માતા-પિતા પાસેથી પૈસા લેવા પડતા હતા અને તેને લાગવા માંડ્યું હતું કે બોલીવુડમાં પોતાનો ગજ વાગવાનો નથી. એ સમય દરમિયાન જ તેનું બ્રેકઅપ પણ થયું હતું. તે સોફિયા કૉલેજની હોસ્ટેલમાં રહીને ભણતી હતી એ વખતે તેને ઘૂંટણમાં ઈજા થઈ હતી. એ વખતે તેનાથી ઘણી મોટી ઉંમરના ડૉક્ટર સાથે તેનો પ્રેમસંબંધ બંધાયો હતો. રિચાથી ઉંમરમાં ઘણા મોટા એવા એ ફિઝિયોથેરપિસ્ટ રિચાનો ઘૂંટણ સાજો થઈ ગયો એ પછી પણ વર્ષો સુધી સંબંધ જાળવી રાખ્યો હતો. જોકે ત્રણેક વર્ષ પછી એ બન્નેનો સંબંધ તૂટી ગયો હતો.

રિચાને એકલતા અને નિષ્ફળતા ઘેરી વળી હતી એ જ વખતે, 15 ઓગસ્ટ 2010ના દિવસે અનુરાગ કશ્યપે સામેથી કોલ કરીને રોલની ઓફર કરી અને એ ફિલ્મની સફળતા સાથે જ રિચાનો સંઘર્ષ પણ પૂરો થઈ ગયો હતો.

આશુ પટેલ
આશુ પટેલ

આશુ પટેલ એટલે સાહસ, ધૈર્ય અને સરળતાનો સમન્વય. ગુજરાતી પત્રકારત્વમાં તેમને નામ અનેક રેકોર્ડ્સ બોલાય છે. આશુ પટેલે જુદાજુદા વિષયો પર 42 પુસ્તકો લખ્યા છે, જેમાં અંડરવર્લ્ડના ઈતિહાસથી માંડીને વાર્તાસંગ્રહ, નવલકથાઓ અને જીવનલક્ષી પુસ્તકોનો સમાવેશ થાય છે. તેમણે અનેક ગુજરાતી અખબારોમાં તંત્રી તરીકે ફરજ બજાવી છે. તેઓ ‘ગુજરાત સમાચાર’, ‘સંદેશ, ‘દિવ્ય ભાસ્કર’ અને ‘મુંબઈ સમાચાર’ સહિત અનેક ટોચના અખબારોમાં કલમ ચલાવી ચૂક્યા છે. હાલમાં તેઓ ‘દિવ્ય ભાસ્કર’માં સાપ્તાહિક કોલમ ‘બ્લેક એન્ડ વ્હાઈટ’ અને ‘મુંબઈ સમાચાર’માં દૈનિક કોલમ ‘સુખનો પાસવર્ડ’ લખે છે. તેઓ અમેરિકા સહિત અનેક દેશોની સરકારના વિશેષ મહેમાન તરીકે વિદેશપ્રવાસો કરી ચૂક્યા છે. તેમની પ્રથમ અંગ્રેજી નવલકથા ‘મેડમ એક્સ’ પ્રકાશિત થઈ છે જેના પરથી પ્રખ્યાત ફિલ્મ ડિરેક્ટર તિગ્માંશુ ધુલિયા હિન્દી ફિલ્મ બનાવી રહ્યા છે.

No Comments Yet

Leave a Reply

Your email address will not be published.

‘Cocktail Zindagi’ is not just a publication, it is a journey in itself in which you play an important character. We work to bring you stories not only from the crème de la crème but also from the grass root level.We also write content that portrays the beautiful shades of life, thus the name ‘Cocktail Zindagi’.